Tuesday, July 22, 2008

ಮೊಬೈಲ್ ಕಥೆ

ಹಾದಿಯಲ್ಲಿ ಹಾಯುತ್ತ ಇರುವಾಗ ತಮ್ಮಷ್ಟಕ್ಕೆ ತಾವೇ ಮಾತನಾಡಿಕೊಂಡು, ನಗುತ್ತ ಇರುವವರನ್ನು ನೋಡಿದ್ದೀರಾ? ಹಿಂದೆ ಇಂಥವರನ್ನು ಎರಡು ವರ್ಗಕ್ಕೆ ಸೇರಿಸಲಾಗಿತ್ತು. ಮೊದಲನೆಯದು ಜ್ಞಾನಿಗಳದ್ದು ಎರಡನೆಯದು ಹುಚ್ಚರದ್ದು, ಆದರೆ ಈ ಕಂಪ್ಯೂಟರ್ ಯುಗದಲ್ಲಿ ಹೊಸದೊಂದು ವರ್ಗದ ಸೇರ್ಪಡೆಯಾಗಿದೆ, ಮೊಬೈಲ್ ಮಲ್ಲರದ್ದು. ನಾಗರೀಕತೆಯ ನಾಗಾಲೋಟಕ್ಕೆ ಸರಿಯಾಗಿ ದಾಪುಗಾಲು ಹಾಕಲು, ಸಮಯದ ಅಭಾವದ ಕೊರತೆಯನ್ನು ನೀಗಿಸಲು, ಮೊಬೈಲ್ ಮನುಕುಲಕ್ಕೆ ಒಂದು ವರದಾನ.

ದಾರಿ ಸವೆಯುತ್ತ ಇರಬೇಕಾದರೆ ಅಪರೂಪದ ಗೆಳೆಯನೋ, ಗೆಳತಿಯೋ, ಸಂಬಂಧಿಕರೋ, ಎದುರಾದರೆ ಕುಶಲ ಪ್ರಶ್ನೆಗೆ ಬದಲಾಗಿ ನಿಮ್ಮ ಮೊಬೈಲ್ ನಂಬರ್ ಏನು, ಆನಂತರ ಕರೆ ಮಾಡುತ್ತೇನೆ ಎಂದು ವಿದಾಯ ಹೇಳುವಷ್ಟರ ಮಟ್ಟಿಗೆ ಬೆಳೆದಿದೆ ನಮ್ಮ ಮೊಬೈಲ್ನೊಂದಿಗಿನ ಸಂಬಂಧ. ಒಂದು ವೇಳೆ ನಿಮ್ಮ ಬಳಿ ಮೊಬೈಲಿಲ್ಲವಾಗಿದ್ದು ನಿಜವನ್ನು ನುಡಿದರೆ, ಯಾವುದೋ ಅನಾಗರಿಕ ಪ್ರಪಂಚದಿಂದ ಬಂದ ಕ್ಷುಲ್ಲಕ ಜೀವಿ ಎಂದು ನಿಮ್ಮ ಪರಿಸ್ಥಿತಿಗೆ ಅವರು ಮರುಕಗೊಂಡರೂ ಆಶ್ಚರ್ಯವಿಲ್ಲ! ಇಂತಹ ಸಂದರ್ಭದಲ್ಲಿ ಪರಿಸ್ಥಿತಿ ನಿಮ್ಮ ಅಹಂಕಾರವನ್ನು ಮೆಟ್ಟಿ ನಿಮ್ಮನ್ನು ಪಾತಾಳಕ್ಕೆ ಕುಗ್ಗಿಸುತ್ತದೆ.

ಇಂದು ಮೊಬೈಲ್ ಬರಿ ವಾಹಕ ಸಾಧನವಾಗಿರದೆ ನಿಮ್ಮ ಅಂತಸ್ತನ್ನು ಪ್ರದರ್ಶಿಸುವ ಸಾಧನವೂ ಆಗಿದೆ. ಕೇವಲ ಒಂದು ಸಾವಿರದಿಂದ ಹಿಡಿದು ಐವತ್ತು ಸಾವಿರದ ಮುಖಬೆಲೆಯವರೆಗಿನ ಬಹುಮುಖ ಸಾಧನವಾಗಿ ಮೊಬೈಲ್ ಬೆಳೆಯುತ್ತಿದೆ. ಕ್ಯಾಮೆರಾ, ಮ್ಯೂಸಿಕ್ ಪ್ಲೇಯರ್, ಗೇಮ್ಸ್, ಇಂಟರ್ನೆಟ್, ಬ್ಲೂ-ಟೂತ್ ಮುಂತಾದ ಹತ್ತು ಹಲವು ಸೌಲಭ್ಯಗಳೊಂದಿಗೆ, ವಿವಿಧ ವರ್ಣ, ಚಿತ್ತಾರಗಳೊಂದಿಗೆ ಗಮನ ಸೆಳೆಯುತ್ತದೆ.

ಸುಮಾರು ಎರಡು ವರ್ಷಗಳೊಂದಿಗೆ ನನ್ನೊಂದಿಗಿದ್ದ ನನ್ನ ಕಡಿಮೆ ಬೆಲೆಯ ಮೊಬೈಲಿನ ಅಂದ ಕೆಡುತ್ತ ಬಂದಿತ್ತು. ಇತರರಿಗೆ ಮುಖ ತೋರಿಸಲು ಅದು ತುಂಬಾ ನಾಚಿಕೊಳ್ಳುತ್ತಿದ್ದರೂ, ತನ್ನ ಕೈಲಾದ ಕೆಲಸವನ್ನು ಅಚ್ಚುಕಟ್ಟಾಗಿಯೇ ನಿರ್ವಹಿಸುತ್ತಿತ್ತು. ಒಂದು ದಿನ, ಜಾಹೀರಾತಿನ ಜಾಲಕ್ಕೆ ಒಳಗಾಗಿ ಒಂದು ಅಂದಗಾತಿಯ ಮೋಹಕ್ಕೆ ಒಳಗಾದೆ. ನನ್ನ ಈಗಿನ ಮೊಬೈಲ್ ಕುಳ್ಳಗಿನ, ದಪ್ಪನೆಯ ಶರೀರದ ನಡುವಯಸ್ಸಿನ ಗರತಿಯಂತೆ ನಾಚಿಕೊಳ್ಳುವ ಸ್ವಭಾವದ್ದು. ಆದರೆ ಆ ಜಾಹೀರಾತಿನ ಕೆಂಪು ಬಣ್ಣದ, ಉದ್ದನೆಯ ನೀಳ ಶರೀರದ, ಚೆಲ್ಲಾಟದ ಚೆಲುವೆ ನನ್ನ ರೊಮ್ಯಾಂಟಿಕ್ ಮನೋವೃತ್ತಿಗೆ ತುಂಬಾ ಹಿಡಿಸಿತು. ಅಲ್ಲದೆ ನನ್ನ ಈಗಿನ ಮೊಬೈಲ್ಗೆ ಹೋಲಿಸಿದರೆ ಅದು ಇನ್ನೂ ಹೆಚ್ಚಿನ ಸೇವೆಯನ್ನು ಒದಗಿಸುವುದಾಗಿತ್ತು.

ಮನೆಯ ಬಳಿಯಲ್ಲೇ ಇರುವ "ಸೇಲ್ಸ್ & ಸರ್ವಿಸ್" ಎಂದು ದೊಡ್ಡದಾಗಿ ಫಲಕವನ್ನು ಹಾಕಿಕೊಂಡ ಒಂದು ಮೊಬೈಲ್ ಅಂಗಡಿಗೆ ಭೇಟಿ ಕೊಟ್ಟೆ. ಅದರ ಬೆಲೆ ಕೇಳಿ ಒಮ್ಮೆ ದಂಗಾದರೂ ಅದನ್ನು ತೋರ್ಪಡಿಸಿಕೊಳ್ಳದೆ ಕೊಂಡೆ. ನನ್ನ ಹಳೆಯ ಮೊಬೈಲನ್ನು ಮಾರುವ ಮನಸ್ಸಿದ್ದರೂ ಅದರ ಬೆಲೆಯನ್ನು ಕೇಳಿ ನಿರಾಶೆಯಾಗಿ ಮನೆಗೆ ತಂದು ಒಂದು ಮೂಲೆಯಲ್ಲಿ ಇರಿಸಿದೆ.

ಇನ್ನು ಮುಂದಿನ ನನ್ನ ಕೆಲಸ ಹೊಸ ನಲ್ಲೆಯನ್ನು ಒಲಿಸುವುದು. ಅದರೊಂದಿಗೆ ಬಂದ ದಪ್ಪನೆಯ ಪುಸ್ತಕ ಓದಿ ಅದರ ಗುಣಾವಗುಣಗಳನ್ನು ಅವಲೋಕಿಸತೊಡಗಿದೆ. ನನ್ನ ಮೊದಲ ಮೊಬೈಲ್ನಷ್ಟು ಸುಲಭವಾಗಿ ಇದು ನನಗೆ ಒಲಿಯಲಿಲ್ಲ. ಅಲ್ಲದೆ ಏನೋ ಒಂದು ಬಗೆಯ ಅಳುಕು, ಸಂಕೋಚ ಎಲ್ಲಿ ತಪ್ಪು ಮಾಡುವೆನೋ ಎಂಬ ಭಯ. ಅದರ ನುಣುಪಾದ ಹೊರಮೈ ಹಾಳಾಗದಂತೆ ಅದಕ್ಕೊಂದು ಪ್ಲಾಸ್ಟಿಕ್ ಕವಚ ಕೂಡ ಹೊದಿಸಿದ್ದಾಯಿತು.

ನನ್ನ ಹೊಸ ಮೊಬೈಲ್ ನನಗೆ ರೇಡಿಯೋ ಕೇಳಿಸಬಲ್ಲದು, ನನಗಿಷ್ಟವಾದ ಹಾಡನ್ನು ಸಂಗ್ರಹಿಸಿ ನನ್ನ ಮನೋಭಾವನೆಗೆ ತಕ್ಕಂತೆ ಹಾಡನ್ನು ಕೇಳಿಸಬಲ್ಲದು, ಇಂಟರ್ನೆಟ್ನ್ನು ಸಂಪರ್ಕಿಸಬಹುದಿತ್ತು, ಹೊಸ ಹೊಸ ಗೇಮ್ಸ್ ಆಡಬಹುದಿತ್ತು. ನನ್ನ ಗೆಳೆಯರಿಗೆ, ಸಹೋದ್ಯೋಗಿಗಳಿಗೆ ತೋರಿಸಲು ಏನೋ ಒಂದು ಬಗೆಯ ಉತ್ಸಾಹ. ನನ್ನ ಹಳೆಯ ಮೊಬೈಲ್ನಂತೆ ನಾಚಿಕೆಯ ಮುದ್ದೆಯಾಗಿರದೆ ಎಲ್ಲರೊಂದಿಗೆ ಬೆರೆಯುವ ನಾಗರಿಕ ಯುವತಿಯಂತಿತ್ತು.ಗೆಳೆಯರು ಅದನ್ನು ಹೊಗಳುವಾಗ ಮನಸ್ಸು ತುಂಬಿ ಬರುತ್ತಿತ್ತು.

ಆದರೆ ಈ ಸುಖ ಬಹಳ ಕಾಲದವರೆಗೆ ಮುಂದುವರಿಯಲಿಲ್ಲ. ಹಿಂದಿನ ಮೊಬೈಲ್ನ್ನು ಇಡಬೇಕಾದರೆ ದೂರದಿಂದ ಎಸೆದರೂ ಬೇಸರಿಸಿಕೊಳ್ಳದೆ ಕೂರುತ್ತಿತ್ತು. ಆದರೆ ಇದನ್ನು ತುಂಬಾ ನಾಜೂಕಾಗಿ ಬಳಸಬೇಕಿತ್ತು, ಜೇಬಿನಲ್ಲಿ ಇರಿಸಿಕೊಂಡರೆ ಬೇರೆ ಏನೂ ತಾಕದಂತೆ, ಉಪಯೋಗಿಸದೆ ಇದ್ದಾಗ ಒಣಗಿದ ಶುಭ್ರ ಜಾಗದಲ್ಲಿ ತುಂಬಾ ಜೋಪಾನವಾಗಿ ಇಡಬೇಕಿತ್ತು, ಎಸೆದರೆ ಎಲ್ಲಿ ಹಾಳಾಗುವುದೋ ಎಂಬ ಭಯ. ಹಳೆಯ ಮೊಬೈಲ್ ಬೇರೆ ಯಾರ ಜೊತೆಗೂ ಹೋಗದೆ ನನ್ನೊಂದಿಗೆ ಇದ್ದರೆ, ಇದು ಇನ್ನೊಬ್ಬರ ಬಳಿ ಹೋದರೆ ಮತ್ತೆ ಬರುವ ಸೂಚನೆಯೇ ಇಲ್ಲದವರಂತೆ ಇರುತ್ತಿತ್ತು. ಬರಿ ೨೫೦ ರೂ. ಗಳಷ್ಟು ಬರುತ್ತಿದ್ದ ನನ್ನ ಮೊಬೈಲ್ ಬಿಲ್ ಇಂಟರ್ನೆಟ್ನ ದೆಸೆಯಿಂದ ೧೦೦೦ ರೂ. ಗಳಷ್ಟು ಏರಿತು. ಇದಕ್ಕೂ ಸಾಲದೆಂಬಂತೆ ಒಂದು ದಿನ ಕೆಲಸ ಮಾಡುವುದನ್ನೇ ನಿಲ್ಲಿಸಿತು. ಹಿಂದಿನ "ಸೇಲ್ಸ್ & ಸರ್ವಿಸ್" ಅಂಗಡಿಗೆ ಹೋದರೆ, ನಾವು ಬರಿ ಸೇಲ್ಸ್ಗೆಮಾತ್ರ, ಸರ್ವಿಸ್ಗೆ ನಮ್ಮ ಮನೆಯಿಂದ ಸುಮಾರು ೧೦ ಕಿ. ಮೀ. ಗಳಷ್ಟು ದೂರವಿರುವ ಇನ್ನೊಂದು ಅಂಗಡಿಯ ಕಡೆ ಬೊಟ್ಟು ಮಾಡಿ ತೋರಿಸಿದರು. ಅವರ ಸರ್ವಿಸ್ನ್ನು ಶಪಿಸುತ್ತ ವಾರಾಂತ್ಯದಲ್ಲಿ ಅದನ್ನು ಶುಶ್ರೂಷೆಗೆ ಕರೆದೊಯ್ದದ್ದಾಯಿತು.

ಹೀಗೆಯೇ ದಿನದಿಂದ ದಿನ ಅದರ ಆರೋಗ್ಯ ಹದಗೆಟ್ಟಂತೆ, ನನ್ನ ಶುಶ್ರೂಷೆ ಮುಂದುವರೆಯುತ್ತಾ ಹೋಯಿತು. ಕೊನೆಕೊನೆಗೆ ನನಗೆ ಅದರಿಂದ ಕರೆ, ಸಂದೇಶ ಕಳಿಸುವುದೂ ಕಷ್ಟವಾಗತೊಡಗಿತು. ನನ್ನ ಹಿಂದಿನ ಮೊಬೈಲ್ಗೆ ಚಿಕ್ಕ ಮಕ್ಕಳೆಂದರೆ ತುಂಬಾ ಇಷ್ಟ, ವಿರಾಮವಿದ್ದಾಗ ಅವರೊಂದಿಗೆ ಕಾಲ ಕಳೆಯುತ್ತಿತ್ತು. ಹೊಸ ಮೊಬೈಲಿನ ನಾಜೂಕಿಗೆ ಬೆದರಿದ ಮಕ್ಕಳೂ ಕೂಡ ನನ್ನಿಂದ ದೂರವಾಗತೊಡಗಿದರು.

ಹೀಗೆಯೇ ಒಂದು ದಿನ ೪ ಗಂಟೆಯ ಸುಖವಾದ ನಿದ್ದೆಯಲ್ಲಿ ಇರಬೇಕಾದರೆ, ಆಗಂತುಕನಾಗಿ ನಮ್ಮ ಮನೆಗೆ ಬಂದಿದ್ದವನೊಡನೆ, ನನಗೆ ಒಂದೂ ಮಾತೂ ಹೇಳದೆ ಹೊರಟು ಹೋಗಿತ್ತು. ನನ್ನ ಹಳೆ ಮೊಬೈಲ್ ಕವಾಟಿನ ಒಂದು ಮೂಲೆಯಿಂದ ಮಂದಸ್ಮಿತ ಬೀರುತ್ತಿತ್ತು. ಆದರೆ ಅದು ಕುಹಕದ ನಗುವಾಗಿರದೆ ಪ್ರಿಯಕರನನ್ನು ಮತ್ತೆ ಒಲಿಸುವಂತೆ ಇತ್ತು...

1 comment:

  1. ಹೋ... ವಾರಾಂತ್ಯದಲ್ಲಿ ಶುಶ್ರೂಷೆಯೂ ನಡೆಯುತ್ತದಾ?? ಇದುವರೆಗೆ ಓದಿದ ನಿಮ್ಮ ಎಲ್ಲ ಬರಹಗಳೂ ಇಷ್ಟವಾದವು.. ಚೆನ್ನಾಗಿ ಬರೆಯುತ್ತೀರಿ.. ಬರೆಯುತ್ತಿರಿ

    ReplyDelete

ವರ್ಗ

Amomum (1) ficus krishnae (1) Gangtok (1) Nikon 40mm f/2.8 Micro (10) paris (1) Sikkim (8) snow (1) Yuksom (5) ಅನಿಮೇಟೆಡ್ (1) ಅನುಭವ ಕಥನ (7) ಅಮೂರ್ತ (1) ಆಟೋಟ (2) ಆಫಿಡ್ (1) ಇರುವೆ (6) ಉಡುಪಿ (4) ಉರಗ (3) ಏರಿ (1) ಒಂಟಿ ಚಕ್ರದ ಸೈಕಲ್ (1) ಒಯ್ಯುಗೆ (6) ಕದ (1) ಕಂದು ಏಲಕ್ಕಿ (1) ಕನ್ನಡ (2) ಕಪ್ಪು ಏಲಕ್ಕಿ (1) ಕಪ್ಪು-ಬಿಳುಪು (5) ಕಂಬಳ (1) ಕಂಬಳಿಹುಳು (2) ಕವನ (15) ಕವಿ ಶೈಲ (1) ಕಸರತ್ತು (1) ಕಳಸ (1) ಕಳ್ಳತನ (1) ಕಾವೇರಿ (1) ಕಾಳಾವಾರ ಬೆಟ್ಟ (1) ಕಾಳಿಂಗ ಸರ್ಪ (1) ಕಿಸ್ಕಾರ (1) ಕೀಟ ಪ್ರಪಂಚ (35) ಕುಂದಾಪುರ (1) ಕುವೆಂಪು (1) ಕೃಷಿ (9) ಕೃಷಿ ಮೇಳ (4) ಕೆರೆ (2) ಕೆಲಸ (2) ಕೆಸು (2) ಕೆಳದಿ (1) ಕೊಕ್ಕರೆ ಬೆಳ್ಳೂರು (1) ಕೋಟ (8) ಖಗೋಳ ಗಡಿಯಾರ (1) ಗವಿ (1) ಗುಡಿ ಕೈಗಾರಿಕೆ (1) ಗುಡ್ಡ (2) ಗುಹೆ (1) ಚಾರಣ (3) ಚಿಕ್ಕಮಗಳೂರು (1) ಚಿಟ್ಟಾಣಿ (1) ಚಿಟ್ಟೆಗಳು (3) ಚಿತ್ರ ಪುಟ (101) ಚಿತ್ರದುರ್ಗ (1) ಚಿತ್ರಪುಟ (1) ಚೌಕಾಶಿ (1) ಛಾಯಾಗ್ರಹಣ (24) ಜನ ಜೀವನ (52) ಜನಪದ (2) ಜರ್ಮನಿ (1) ಜಲಪಾತ (1) ಜೆಕ್ ಗಣರಾಜ್ಯ (4) ಜೇಡ (3) ಜೇನು ಸಾಕಣೆ (1) ಜೋಡಿ (1) ತರಕಾರಿ (2) ತುಮಕೂರು (2) ತೆಂಗಿನ ಕಾಯಿ (1) ತೆಂಗಿನ ತೋಟ (1) ದಸರ (4) ದೇವವೃಂದ (1) ದೇವಸ್ಠಾನ (1) ದೊಡ್ಡ ಏಲಕ್ಕಿ (1) ಧಾರವಾಡ (1) ನಂಬಿಕೆ (1) ನಾಟಕ (1) ನೀರ್ಹಕ್ಕಿ (6) ಪತಂಗ (1) ಪತ್ರಿಕೋದ್ಯಮ (1) ಪಶ್ಚಿಮ ಘಟ್ಟ (2) ಪಾಳು (1) ಪುಸ್ತಕ ಬಿಡುಗಡೆ (1) ಪೋರ್ಟ್ರೈಟ್ (8) ಪ್ರಬಂಧ (2) ಪ್ರವಾಸ ಕಥನ (3) ಪ್ರಾಹ (1) ಪ್ಲಾಸ್ಟಿಕ್ (1) ಬಕೇಟ್ (1) ಬಂಡಿ (1) ಬಣ್ಣ (1) ಬನವಾಸಿ (1) ಬಳ್ಳಿ (1) ಬಾಗಿಲು (1) ಬಾರ್ಕೂರು (1) ಬೀಗ (1) ಬೆಂಗಳೂರಿನ ಚಿತ್ರಗಳು (5) ಬೆಂಗಳೂರು (24) ಬೇಸಾಯ (1) ಬ್ರಹ್ಮಾವರ (1) ಭಾರತ ಬಂದ್ (1) ಭಿಕ್ಷುಕರು (1) ಮಕ್ಕಳು (10) ಮಂಜು (2) ಮಮ್ಮಮ್ (3) ಮಲೆನಾಡು (1) ಮಳೆ (1) ಮಳೆಗಾಲ (2) ಮಾರಿಕಣಿವೆ (1) ಮುಸ್ಸಂಜೆ (1) ಮೇಲುಕೋಟೆ (2) ಮೈಸೂರು (7) ಮೋಡ (2) ಮ್ಯಾಕ್ರೋ (12) ಯಕ್ಷಗಾನ (2) ರಸ್ತೆ (5) ರಾತ್ರಿ ನೋಟ (3) ರೈಮ್ (1) ರೈಲು (2) ರೈಲುಹಳಿ (1) ಲಲಿತ ಪ್ರಬಂಧ (6) ಲೇಪಾಕ್ಷಿ (1) ವಂಡಾರ್ (1) ವಾಸ್ತು ಶಿಲ್ಪ (1) ವಾಹನ (2) ವಿವೇಕ (1) ವ್ಯಕ್ತಿ ವಿಷಯ (3) ವ್ಯಾಪಾರ (1) ಶಾಲೆ (1) ಶಿರಸಿ (1) ಶಿರಸಿ. ಸೈಕಲ್ (1) ಶಿಲ್ಪ (1) ಶಿವನಸಮುದ್ರ (1) ಶುಭಾಶಯ (2) ಸಣ್ಣ ಕಥೆ (4) ಸಂತೆ (2) ಸಮುದ್ರ (2) ಸಮುದ್ರ ಜೀವಿ (2) ಸಸ್ಯ ಪ್ರಪಂಚ (12) ಸಾಕು ಪ್ರಾಣಿ (4) ಸಾಸ್ತಾನ (1) ಸಿಕ್ಕಿಂ (3) ಸೈಕಲ್ (5) ಸೈಕಲ್ ಯಾತ್ರೆ (1) ಸ್ಕಂದಗಿರಿ (1) ಸ್ತೂಪ (1) ಸ್ಪರ್ಧೆ (1) ಹಕ್ಕಿಗಳು (21) ಹಳ್ಳಿ (3) ಹಿಮ (1) ಹೂಗಳು (5) ಹೊಸ ವರ್ಷ (1) ಹೋಂ ಸ್ಟೇ (1) ಹೌರಾ (1)