Wednesday, June 30, 2010

ಬೆಳಕಿನ ಜಾಡು ಮತ್ತು ದುಗ್ಗಪ್ಪನ ಕಟ್ಟೆ

ಕಳಸದ ದೇವಸ್ಥಾನದ ಹಿಂದೆ ಇದ್ದ ಗುಡ್ಡದ ಮೇಲೆ ಮಂಟಪದಂತಿದ್ದ ರಚನೆಯ ಕಡೆ ಬೊಟ್ಟು ಮಾಡಿ ’ಅದೇನು’ ಎಂದು ನನ್ನ ಅಣ್ಣನ ಹತ್ತಿರ ಕೇಳಿದೆ. ’ಓ ಅದಾ, ಫಾರೆಸ್ಟಿನವರು ಕಟ್ಟಿಸಿದ ವೀಕ್ಷಣಾ ಗೋಪುರ, ಅಲ್ಲಿ ನಿಂತರೆ ಕಳಸ ಪೇಟೆ ಚೆಂದ ಕಾಣ್ಸುತ್ತೆ. ಫೋಟೋ ತೆಗೀಬೇಕು ಅಂತಿದ್ರೆ ಹೋಗೋಣ’ ಅಂತಂದ. ’ಈಗ ಬೇಡ ಸಂಜೆ ಕತ್ತಲಾದ ಮೇಲೆ ಹೋಗೋಣ’ ಎಂದೆ.


ರಾತ್ರಿಯ ವೇಳೆಯಲ್ಲಿ ವಾಹನದ ಹೆಡ್-ಲೈಟ್ ಮೂಡಿಸುವ ಬೆಳಕಿನ ಜಾಡನ್ನು ಸೆರೆಹಿಡಿದಂತಹ ಚಿತ್ರವನ್ನು ಈ ಹಿಂದೆ ಅನೇಕ ಬಾರಿ ಅಂತರ್ಜಾಲದಲ್ಲಿ ನೋಡಿದಾಗಲೆಲ್ಲವೂ ಇಂತದ್ದೊಂದು ಚಿತ್ರ ತೆಗೀಬೇಕು ಅಂತ ಅಂದುಕೊಳ್ತಾ ಇದ್ದೆ. ಅಂದುಕೊಂಡಿದ್ದೇನೋ ನಿಜವಾದರೂ ಅದಕ್ಕಾಗಿ ಒಮ್ಮೆಯೂ ಪ್ರಯತ್ನಿಸಿದ್ದಿಲ್ಲ. ಈಗ ಹೇಗೂ ನೋಟಕ್ಕೆ ಒಳ್ಳೆಯ ಕೋನ ದೊರೆತಿದೆ. ರಾತ್ರಿ ಪೇಟೆಯ ಬೆಳಕಿನ ಜೊತೆ ದೇವಸ್ಥಾನದ ರಥಬೀದಿಯಲ್ಲಿ ಓಡಾಡುವ ವಾಹನದ ಬೆಳಕೂ ಸೇರಿದರೆ ಚಂದ ಕಾಣಬಹುದಲ್ಲವೇ ಎಂದು ನನ್ನ ಊಹೆ.

ಸಂಜೆಯ ನಂತರ ಸುಮಾರು ಎಂಟು ಗಂಟೆಯ ಸಮಯದಲ್ಲಿ ಕಾಲ್ನೆಡಿಗೆಯಲ್ಲಿ ಗುಡ್ಡ ಹತ್ತಲಾರಂಭಿಸಿದೆವು. ಮಣ್ಣಿನ ಹಾದಿ ಇದ್ದುದರಿಂದಲೂ ಮತ್ತು ಗುಡ್ಡ ಅಷ್ಟೇನೂ ಕಡಿದಾಗಿರದೆ, ಚಿಕ್ಕದಾಗಿದ್ದರಿಂದ ನಿರಾಯಾಸವಾಗಿ ಗುಡ್ಡದ ನೆತ್ತಿ ತಲುಪಿದೆವು. ದಾರಿಯಲ್ಲಿ ಬರುತ್ತಾ ಒಂದು ಕುತೂಹಲಕಾರಿಯಾದ ಘಟನೆ ನಡೆಯಿತು. ಮೇಲೆ ಮೇಲಕ್ಕೆ ಬರುತ್ತಿದ್ದಂತೆ, ನಮ್ಮ ಪಿಸುಗುಡುವ ದನಿಗೋ ಅಥವಾ ಟಾರ್ಚಿನ ಬೆಳಕಿಗೋ, ಅಲ್ಲಲ್ಲಿ ಮರದ ಮೇಲೆ ಮಲಗಿದ್ದ ಹಕ್ಕಿಗಳು ಅಸಮಾಧಾನ ಮಾಡಿಕೊಂಡು ಗಲಾಟೆ ಮಾಡಲಾರಂಭಿಸಿದೆವು. ನಮ್ಮ ತಪ್ಪಿನ ಅರಿವಾಗಿ ಟಾರ್ಚಿನ ಬೆಳಕಿನ್ನು ಆರಿಸಿ, ಮೌನದಿಂದ ಮುಂದುವರಿದ ಮೇಲೆ ಅವು ಸುಮ್ಮನಾದವು.

ನೆತ್ತಿಯ ಮೇಲೆ ಸಿಮೆಂಟ್ ನೆಲವಿದ್ದುದರಿಂದ ಟ್ರೈಪಾಡ್ ನಿಲ್ಲಿಸುವಲ್ಲಿ ಹೆಚ್ಚಿನ ಶ್ರಮ ಪಡಬೇಕಾಗಿರಲಿಲ್ಲ. ಈ ಟ್ರೈಪಾಡ್ ನಿಲ್ಲಿಸಬೇಕಾದರೆ ಅದರ ಒಂದು ಕಾಲು ನಾವು ತೆಗಯಹೊರಟ ಚಿತ್ರದ ವಿಷಯದ ಕಡೆ ಇದ್ದರೆ, ಅದರ ಇನ್ನೆರಡು ಕಾಲಿನ ನಡುವೆ ಸಾಕಷ್ಟು ಸ್ಥಳಾವಕಾಶ ಒದಗಿ ಚಿತ್ರ ತೆಗೆಯಲು ಅನುಕೂಲ. ಟ್ರೈಪಾಡಿಗೆ ಕ್ಯಾಮೆರಾ ಸಿಕ್ಕಿಸಿ, ವಿವ್ ಫೈಂಡರಿನಲ್ಲಿ ಯಾವ ಫ್ರೇಮ್ ತೆಗೆಯಬಹುದು ಎಂದು ಲೆಕ್ಕಾಚಾರ ಹಾಕಿದೆ. ಅಪಾರ್ಚರ್ ಪ್ರಿಯಾರಿಟಿ ಮೋಡಿನಲ್ಲಿ ಕ್ಯಾಮರಾದ ISO ಎಷ್ಟು ಸಾಧ್ಯವೋ ಅಷ್ಟು ಕಡಿಮೆ ಮಾಡಿ ಕೊಂಡು, ಅಪಾರ್ಚರ್ ಚಿಕ್ಕದು ಮಾಡುತ್ತಾ ಬಂದೆ. ISO 250, Aperture f20, 30 ಸೆಕೆಂಡ್ shutter speedನಲ್ಲಿ ನನ್ನ ಕ್ಯಾಮರಾ ಸಹಜವಾದ exposure ತೋರಿಸಿತು. ಇನ್ನು ಫೋಕಸಿಂಗ್, ಕತ್ತಲೆಯಲ್ಲಿ ಫೋಕಸ್ ಮಾಡುವುದು ನಿಜಕ್ಕೂ ಕಷ್ಟದ ಕೆಲಸ. ಆಟೋ ಪೋಕಸ್ ಆದರೆ ಚೆನ್ನಾಗಿ ಬೆಳಗಿದ ಯಾವುದಾದರೂ ವಸ್ತುವಿಗೆ ಫೋಕಸ್ ಮಾಡಬೇಕಾಗುತ್ತದೆ. ಇದರಿಂದ ಕ್ಯಾಮರಾದ ಫೋಕಸ್ infiniteಗೆ ಹೊಂದಿಕೊಳ್ಳುವುದು ಮತ್ತು ಅಪಾರ್ಚರ್ ತೆರವು ಚಿಕ್ಕದಿರುವುದರಿಂದ ಫ್ರೇಮಿನ ಮೊದಲಿಂದ ಕೊನೆಯವರೆಗೂ ಸ್ಪುಟವಾದ ಚಿತ್ರ ಮೂಡುತ್ತದೆ. ಇದು ಸಾಧ್ಯವಾಗದೇ ಹೊದರೆ ಕ್ಯಾಮರಾದ focusing modeನ್ನು manualಗೆ ಬದಲಿಸಿ, infiniteಗೆ ಹೊಂದಿಸಬಹುದು.

ಇನ್ನು ಕ್ಯಾಮರಾದ ಬಟನ್ ಅಮುಕಲು ಕಾಯಬೇಕಿದ್ದುದು ವಾಹನ ರಸ್ತೆಯನ್ನು ಪ್ರವೇಶಿಸುವುದಕ್ಕಾಗಿ ಮಾತ್ರ. ಹಾಗೇ ಪ್ರವೇಶಿಸಿದ ಮೇಲೆ ತೆಗೆದ ಚಿತ್ರ ಈ ಕೆಳಗಿನದು. ರಸ್ತೆಯಲ್ಲಿ ಕಾಣುವ ಕೆಂಪಗಿನ ಬೆಳಕಿನ ಜಾಡು ನನ್ನ ದಿಕ್ಕಿನಿಂದ ದೂರ ಸರಿಯುತ್ತಿರುವ ವಾಹನದ್ದು, ಇನ್ನೊಂದು ಬಣ್ಣದ್ದು ನಾನಿದ್ದ ಕಡೆಗೆ ಬರುತ್ತಿರುವ ವಾಹನದ್ದು. ಈ ಚಿತ್ರ ೩೦ ಸೆಕೆಂಡು ಇಲ್ಲಿ ಏನೇನಾಯಿತು ಎಂದು ಸೆರೆಹಿಡಿದಿಟ್ಟಿದೆ. ಚಳಿ, ಗಾಬರಿಯಿಂದ ಕೆಲವೊಮ್ಮೆ ಬಟನ್ ಅಮುಕುವ ವೇಳೆಯಲ್ಲಾಗುವ ಕ್ಯಾಮರಾದ ಕುಲುಕಾಟವನ್ನು ತಡೆಗಟ್ಟಲು self timer ಅಥವಾ remote ಬಳಸಬಹುದು. ಚಿತ್ರ ತೆಗೆದ ಸ್ವಲ್ಪ ಹೊತ್ತಿನ ನಂತರ ವಾತಾವರಣದಲ್ಲಿ ಮೋಡ ಕವಿಯಲಾರಂಭಿಸಿ, ಪೇಟೆಯಲ್ಲಿ ವಿದ್ಯುತ್ ನಿಲುಗಡೆ ಕೂಡ ಆಯಿತು. ಮಂಜಿನಲ್ಲಿ ಮಸುಕಾದ ಹಿನ್ನೆಲೆಯಿಂದಿಣುಕುವ ಮರಗಳನ್ನು ನೋಡುತ್ತಾ ಅಲ್ಲೇ ಸ್ವಲ್ಪ ಹೊತ್ತು ಕುಳಿತು, ಮನೆಗೆ ಮರಳಿದೆವು.


A NIGHT VIEW OF KALASA

ಚಿತ್ರ ತೆಗೆದ ಮೇಲೆ ನನ್ನ ಬಳಿ ಇದ್ದ ಜೂಮ್ ಲೆನ್ಸ್ ಮನೆಯಲ್ಲೇ ಬಿಟ್ಟು ಬಂದುದಕ್ಕಾಗಿ ಹಲುಬಿದೆ. ಲ್ಯಾಂಡ್-ಸ್ಕೇಪ್ ತೆಗೆಯಲು ಜೂಮ್ ಲೆನ್ಸ್ ಅಗತ್ಯವಿರುವುದಿಲ್ಲವೆಂಬ ನನ್ನ ಅನಿಸಿಕೆಯನ್ನು ಮರುವಿಮರ್ಷೆ ಮಾಡಿಕೊಳ್ಳಬೇಕು. ಅದು ಇದ್ದಿದ್ದರೆ ಬರೀ ರಸ್ತೆಯನ್ನು ಮಾತ್ರ ವಿಷಯವಾಗಿರಿಸಿಕೊಂಡು ಬೆಳಕಿನ ಜಾಡಿನಿಂದ ಫ್ರೇಮನ್ನು ಪರಿಣಾಮಕಾರಿಯಾಗಿ ತುಂಬಿಸಬಹುದಿತ್ತು. ಒಂದರ್ಥದಲ್ಲಿ ಇದು ನಿಜವಾಗಿಯೂ ಬೆಳಕಿನ ಜಾಡೇ ಮುಖ್ಯವಾಗಿರುವ ಚಿತ್ರ ಅಲ್ಲ, ರಾತ್ರಿಯ ನೋಟ ಅನ್ನಬಹುದು.

Monday, June 28, 2010

ತುಂಬಾ ಸಿಹಿ, ಒಂಚೂರು ಖಾರ

CSC_6329

CSC_6328

CSC_6330

CSC_6331

CSC_6333

ಹೂವಿನ, ಮೆಣಸಿನ ಹೆಸರು ನೀವು ತಿಳಿಸ್ತೀರಲ್ಲ?

Thursday, June 24, 2010

ಕಾಫೀ ಬೀಜ ಗೇರುವಾಗ

ಹೊರನಾಡಿನ ದೇವಸ್ಥಾನದ ಒಳಗೆ ಕಾಣಿಸಿದ ಕಾಫೀ ಬೀಜ ಗೇರುವ ನೋಟ. ನಮ್ಮೂರಲ್ಲಿ ಈ ಕೆಲಸಕ್ಕೆ ಗೇರುವುದು ಅಂತಾನೂ ಮತ್ತೆ ಸಾಧನಕ್ಕೆ ಗೆರ್ಸಿ ಅಂತಾನೂ ಕರೀತಾರೆ. ನಿಮ್ಮ ಕಡೆ ಏನಂತಾರೆ ಅಂತ ನೀವು ತಿಳಿಸ್ತೀರಲ್ಲ...

ಮೊದಲ ಚಿತ್ರದಲ್ಲಿ ಅಜ್ಜಿ ಮುಖ ಸ್ಪುಟವಾಗಿದ್ರೂ ಕೈ, ಗೆರ್ಸಿ ಅಸ್ಪಷ್ಟವಾಗಿ ಚಲನೆಯನ್ನು ಸೂಚಿಸ್ತಾ ಇದೆ. ಇದಕ್ಕೆ ಬಳಸಿದ Exposure 1/40 ಸೆಕೆಂಡುಗಳು. ಇಲ್ಲಿ ನನ್ನ lens VR-Vibration Reduction (IS-Image Stabilization) ಆದ್ದರಿಂದ ಇತರ ಸಾಮಾನ್ಯ lensಗಿಂತ ದುಪ್ಪಟ್ಟು ಸ್ಥಿರತೆ ಕೊಡುತ್ತದೆ. ಸಾಮಾನ್ಯ lens ಆಗಿದ್ದರೆ exposure 1/60 ಸೆಕೆಂಡಿಗಿಂತ ಕಡಿಮೆಯಾದಂತೆ ನಮ್ಮ ಕೈಯ ಚಲನೆಯಿಂದ ಚಿತ್ರ ಅಸ್ಪಷ್ಟವಾಗಿ ಕಾಣಿಸುವುದು ಸಹಜ. ಅಜ್ಜಿ ಮುಖದ ಭಾವ ಇಷ್ಟ ಆದ್ರಿಂದ ಈ ಚಿತ್ರ ಇರಿಸಿಕೊಂಡು, ಇದೇ Exposure ಉಪಯೋಗಿಸಿಕೊಂಡು ಮತ್ತೊಂದು ಚಿತ್ರ ತೆಗೆಯೋಕೆ ಪ್ರಯತ್ನಿಸಿದೆ.


ಇದು ನಾ ತೆಗೆದ ಎರಡನೇ ಚಿತ್ರ. ಇಲ್ಲಿ ಕಾಫಿ ಬೀಜದ ಚಲನೆ ಮಾತ್ರ ಗುರುತಿಸಬಹುದು. ಗೆರ್ಸಿ, ಅಜ್ಜಿ ಚಿತ್ರದಲ್ಲಿ ಸ್ಪುಟವಾಗಿ ಚಿತ್ರಿತವಾಗಿದೆ. ಎರಡೂ ಚಿತ್ರದಲ್ಲಿ ಬಳಸಿದ exposure ಒಂದೇ ಆದರೂ ಕಾಲಾವಧಿ (timing) ಹೇಗೆ ಚಿತ್ರದ ಪರಿಣಾಮ ಬದಲಾಯಿಸುತ್ತದೆ ಅಲ್ಲವೇ? ಇದಕ್ಕೇ ಹಿರಿಯರು ಎಲ್ಲದಕ್ಕೂ ಸಮಯ ಕೂಡಿ ಬರ್ಬೇಕು ಅನ್ನೋದು :)


ಚಲನೆಯ ಫೋಟೋ ಇದೇ ರೀತಿ ತೆಗೀಬೇಕಾ, ಯಾವ್ಯಾವ ಚಲನೆಗೆ ಯಾವ exposure ಸರಿಹೊಂದುತ್ತೆ ಅಂತ ಹೇಳೋದು ಕಷ್ಟ. Exposure ೧/೧೦೦ ಅಥವಾ ಅದಕ್ಕಿಂತ ಕಡಿಮೆ ಅವಧಿಗೆ ಇಟ್ಟುಕೊಂಡಿದ್ದರೆ ಕಾಫಿ ಬೀಜವೂ ಸ್ಪುಟವಾಗಿ ಹಾರಾಡ್ತಾ ಇರೋ ಫೋಟೋ ತೆಗೆಯಬಹುದಿತ್ತು. ಬೆಳಕು ಕಮ್ಮಿ ಇದ್ದಿದ್ರಿಂದ ISO ಜಾಸ್ತಿ ಮಾಡಿದ್ದರೆ (ಈ ಚಿತ್ರಕ್ಕೆ ಬಳಸಿದ ISO ೪೦೦ - aperture ನನ್ನ lens ಒದಗಿಸುವ ದೊಡ್ಡ ತೆರವಿಗೆ ಹೊಂದಿಸಿದ್ದೆ) ಆ ಪರಿಣಾಮದ ಚಿತ್ರ ಕೂಡ ಸಿಕ್ತಾ ಇತ್ತೇನೋ. ಆದ್ರೆ ನನ್ನ ತಲೆ ಆ ಅವಧಿಯಲ್ಲಿ ಇದರ ಬಗ್ಗೆ ಯೋಚನೆ ಮಾಡಿರಲಿಲ್ಲ. ಆದರೂ ಚಲನೆ ಬಿಂಬಿಸುವ ಎರಡನೇ ಚಿತ್ರ ನನಗೆ ಇಷ್ಟ ಆಯ್ತು, ನಿಮಗೆ ಹೇಗೆ ಅನ್ನಿಸ್ತು ಅಂತಾನು ತಿಳಿಸಿ.

Friday, June 11, 2010

ಸಮ ಧ್ರುವಗಳು ಪರಸ್ಪರ ವಿಕರ್ಷಿಸುತ್ತವೆ

LIKE POLES REPEL EACH OTHER



ಕಳೆದ ತಿಂಗಳು ಸಾಂಸ್ಕೃತಿಕ ಕಾರ್ಯಕ್ರಮದ ಅಂಗವಾಗಿ ಉಡುಪಿಯ ತಂಡವೊಂದು - ವಿವೇಕ ಜೂನಿಯರ್ ಕಾಲೇಜು, ಕೋಟದಲ್ಲಿ ನಡೆಸಿದ ನಾಟಕದ ಒಂದು ದೃಷ್ಯ. ಧಾರವಾಡದ ’ನೀನಾಸಂ’ ತಂಡವೊಂದರಿಂದ ನಾಟಕ ಪ್ರದರ್ಶನ ಅಂತ ಕುಣಿದಾಡಿಕೊಂಡು ಹೋದರೆ, ಕಾರಣಾಂತರದಿಂದ ಅವರು ಬರದೆ ಜನತೆಯನ್ನು ನಿರಾಸೆಗೊಳಿಸಬಾರದೆಂದು ಈ ನಾಟಕವನ್ನು ಪ್ರದರ್ಶಿಸಲಾಯಿತು. ಸುಮಾರು ೪೦ ಜನ ಸೇರಿದ್ದ ನಾಟಕಕ್ಕೆ ಕೊನೆಯವರೆಗೂ ಉಳಿದದ್ದು ೧೦-೧೫ ಜನ (ರೇಟಿಂಗ್ ಕೊಡೋ ಹೊಸ ವಿಧಾನ). ಅಂದಹಾಗೇ ನಾಟಕದ ಹೆಸರು ’ಸಂಸಾರ ಅಪಾರ್ಟ್ಮೆಂಟ್’. ಕಥಾವಸ್ತು... ಬೇಡ ಬಿಡಿ ಇತ್ತೀಚೆಗಿನ ಯಾವುದಾದರೂ  ಸಾಂಸಾರಿಕ ಚಲನಚಿತ್ರ ನೋಡಿ.


ಇನ್ನಷ್ಟು ಚಿತ್ರಗಳು:
Samsara Apartment

Monday, June 07, 2010

ಬೆಕ್ಕೇ ಬೆಕ್ಕೇ ಮುದ್ದಿನ ಸೊಕ್ಕೇ?

ಕಳೆದ ವಾರ ಊರಿಗೆ ಹೋಗಿದ್ದಾಗ, ಮನೆಯ ಜಗುಲಿಯೊಂದರಲ್ಲಿ ಕಪ್ಪು ಬಣ್ಣದ ತುಂಟ ಬೆಕ್ಕಿನ ಮರಿಯೊಂದು ಕಾಣಿಸಿತು. ಹಿಡಿಕಡ್ಡಿಯೊಂದನ್ನು ಮುಂಗಾಲಿನಲ್ಲಿ ಮೀಟುತ್ತಾ, ಅದು ಚಲಿಸುತ್ತಿದೆ ಎಂಬ ಭ್ರಮೆಯಲ್ಲಿ ಬೆನ್ನಟ್ಟುತ್ತಾ, ಹಲ್ಲಿನಲ್ಲಿ ಕಡಿಯುತ್ತಾ ಆಟವಾಡುತ್ತಿತ್ತು. ಚಿಕ್ಕಂದಿನಲ್ಲಿ ವಠಾರದಲ್ಲಿ ಅಡ್ಡಾಡುತ್ತಿದ್ದ ಪುಂಡ ಬೆಕ್ಕುಗಳಲ್ಲಿ ಕೆಲವು ಕಳ್ಳ ಕಳ್ಳ ಹೆಜ್ಜೆಯಿಟ್ಟು ಕಿಟಕಿಯಿಂದ ನುಗ್ಗಿ ಒಳಬಂದು ಹಾಲು, ಬೆಣ್ಣೆ ಕೊನೆಗೆ ಏನೂ ಸಿಕ್ಕದಿದ್ದರೆ ಎಣ್ಣೆಯನ್ನಾದರೂ ಕುಡಿದು ಪಲಾಯನಗೈಯುತ್ತಿದ್ದವು. ನನ್ನನ್ನೂ ಸೇರಿಸಿ ಮನೆಯವರೂ ಇದುವರೆಗೂ ಮನೆಗೆ ಬರುವ ಬೆಕ್ಕನ್ನು ಓಡಿಸಿದ್ದೆವೆಯೇ ಹೊರತು ಎಂದೂ ಸಾಕಿ ಮುದ್ದು ಮಾಡಿರಲಿಲ್ಲ. ಅಂತದ್ದರಲ್ಲಿ ಈ ಬೆಕ್ಕಿನ ಮರಿ ನಮ್ಮ ಮನೆಗೆ ಹೇಗೆ ಬಂತು ಎಂದು ಕುತೂಹಲವಾಯ್ತು.

ನನ್ನ ತಮ್ಮನನ್ನು ಕರೆದು ಅದರ ಬಗ್ಗೆ ವಿಚಾರಿಸಲಾಗಿ, "ಹೋ ಇದಾ, ಒಂದ್ ಬೆಕ್ ಬಂದ್ ಮರಿ ಹಾಕಿ ಹೋಯ್ತ್. ಎಲ್ಲೆಲ್ ಹಾಕಿತ್ತೇನೋ ಇದ್ರ ಹತ್ರ ಮಾತ್ರ ಸುಳೀಲೇ ಇಲ್ಲ. ಒಂದಿನ ಕಾಂಬುಸಮಿಗೆ ಮನಿ ಮೂಲೆಲ್ ಒಂದ್ ಕಡಿಯಿಂದ್ ಬೆಕ್ಕಿನ್ ಮರಿ ಶಬ್ದ ಕೇಂತಿತ್. ಕಾಂಬುಕೆ ಇಲಿಮರಿಕಣೆಗ್ ಇದ್ದಿತ್. ಕಣ್ಣೂ ಒಡ್ದಿರ್ಲ.. ಮೈ ತುಂಬಾ ಎರು. ಎರುನೆಲಾ ಬಿಡ್ಸಿ ಆವತ್ತಿಂದ್ ಚಮ್ಚದಂಗೆ ಹಾಲು ಕುಡ್ಸಿಯೆ. ಈಗ ಅದೇ ಕುಡಿತ್, ಕಣ್ಣೂ ಒಡ್ತಿತ್." ಎಂದ.

ಮತ್ತೆ ನಾನೇ ಕೆಳಿದೆ, "ಅಲ್ದ ಅದ್ರಬ್ಬಿ ಒಂದ್ಸಲಿಯೂ ಬರ್ಲಿಲ್ಯ ಆಮೇಲೆ, ಅದೆಂತಾ ಬೆಕ್ಕಾಯ್ಕ್" ಅಂದೆ.

"ಒಂದೆರಡ್ ಸಲಿ ಬಂದಿತ್, ನಾವು ಹಾಲು ಕುಡ್ಸುಸಮಿಗೇ ಬಂದಿತ್. ಸುಮ್ನೆ ಕಂಡ್ಕಂಡ್ ಹೋಯ್ತ್" ಅಂದ.

ಸುಟಿ ಸುಟಿಯಾದ ಮರಿಯನ್ನ ನಾನೂ ಮೊದಲಬಾರಿಗೆಂಬಂತೆ ಮುದ್ದು ಮಾಡಿದೆ. ಮೊದಮೊದಲು ಹೆದರಿದರೂ ಕಡೆಗೆ ನನ್ನ ಬಳಿ ನಿರ್ಭಯದಿಂದ ಸುಳಿದಾಡಲು ಆರಂಭಿಸಿತು. ಅದರ ತುಂಟಾಟ ನೋಡುವುದು ಮಾತ್ರ ತುಂಬಾ ಸಂತೋಷದ ಕೆಲಸ. ಈ ಬಾರಿ ಇವೆರಡು ಫೋಟೋ ತೆದೆದಿದ್ದೇನೆ. ಮುಂದಿನ ಬಾರಿ ಊರಿಗೆ ಹೋದರೆ, ಅದರ ತುಂಟಾಟದ ಚಿತ್ರಗಳನ್ನು ಸೆರೆಹಿಡಿಯಲು ಪ್ರಯತ್ನಿಸುವೆ.

ನನ್ನ ಕ್ಯಾಮರಾವನ್ನು ಕುತೂಹಲದಿಂದ ವೀಕ್ಷಿಸುತ್ತಿರುವುದು:

CSC_5824

ಅಂಗೈಯಲ್ಲಿ ಮುದ್ದಿನ ಮರಿ:

KITTEN


"ಥಟ್ ಅಂತ ಹೇಳಿ" ಖ್ಯಾತಿಯ ನಾಸೋ ಸಂಪದದಲ್ಲಿ ಪ್ರತಿಕ್ರಿಯಿಸಿ, ಕಣ್ಣಿನ ಬಗ್ಗೆ ಹೆಚ್ಚಿನ ಮಾಹಿತಿ ಒದಗಿಸಿದ್ದಾರೆ:


  • ಈ ಬೆಕ್ಕು ವಿಶೇಷವಾದದ್ದು. ಬೆಕ್ಕಿನ ಕಣ್ಣು ಸಾಮಾನ್ಯವಾಗಿ ತಿಳಿಹಸಿರು ಅಥವ ಹಳದಿ ಮಿಶ್ರಿತ ಹಸಿರು ಇರುವುದು ಸಾಮಾನ್ಯ. ಇದರ ಕಣ್ಣನ್ನು ನೋಡಿ. ನೀಲಿಯಾಗಿದೆ.
  • ಕಣ್ಣಿನ ಬಣ್ಣವನ್ನು ಒಳಗೊಂಡಂತೆ ದೇಹದ ಎಲ್ಲ ಗುಣಲಕ್ಷಣಗಳನ್ನು ವಂಶವಾಹಿಗಳು ನಿರ್ಧರಿಸುತ್ತವೆ. ಕಣ್ಣಿನ ಬಣ್ಣವನ್ನು ನಿರ್ಧರಿಸುವ ವಂಶವಾಹಿಯು ಮೆಲಾನಿನ್ ಎಂಬ ವರ್ಣಕವನ್ನು ಉತ್ಪಾದಿಸುತ್ತದೆ. ಈ ವರ್ಣಕ ಎಷ್ಟು ದಟ್ಟವಾಗಿದೆ ಎನ್ನುವುದನ್ನು ಆಧರಿಸಿ ಕಣ್ಣಿನ ಬಣ್ಣ ನಿರ್ಧಾರವಾಗುತ್ತದೆ. ಮೆಲಾನಿನ್ ಅತ್ಯಂತ ಕನಿಷ್ಟ ಪ್ರಮಾಣದಲ್ಲಿದ್ದಾಗ ಕಣ್ಣಿನ ಬಣ್ಣ (ಅಂದರೆ ಕಣ್ಣಿನಲ್ಲಿರುವ ಕನೀನಿಕೆ-ಐರಿಸ್-ಯಲ್ಲಿರುವ ಬಣ್ಣ) ನೀಲಿಯಾಗಿ ಕಾಣುತ್ತದೆ.
  • ವಂಶವಾಹಿಗಳಲ್ಲಿ ಕಂಡು ಬರುವ ಹಠಾತ್ ಬದಲಾವಣೆಗಳಾದ ಉತ್ಪರಿವರ್ತನೆ (ಮ್ಯುಟೇಷನ್) ಯು ನೀಲಿ ಬಣ್ಣದ ಕಣ್ಣಿಗೆ ಅವಕಾಶವನ್ನು ಮಾಡಿಕೊಟ್ಟಿತು ಎನ್ನಲಾಗಿದೆ. ತಳಿಪಾರಿಭಾಷಿಕದಲ್ಲಿ ಇದೊಂದು ರಿಸೆಸಿವ್ ಟ್ರೈಟ್.
  • ನೀಲಿ ಕಣ್ಣಿರುವ ಜನರು ವಸ್ತುಗಳ ಚಲನೆಯನ್ನು ಇತರ ಬಣ್ಣದ ಕಣ್ಣಿನವರಿಗಿಂತ ತುಸು ತಡವಾಗಿ ಗುರುತಿಸುತ್ತಾರೆ ಎಂದು ಓದಿದ ನೆನಪು.
  • ನೀಲಿ ಕಣ್ಣುಗಳಿರುವ ಹುಡುಗ/ಹುಡುಗಿ ಅತ್ಯಂತ ಸುಂದರ ಎಂಬ ಮಾತಿದೆ.

ವರ್ಗ

Amomum (1) ficus krishnae (1) Gangtok (1) Nikon 40mm f/2.8 Micro (10) paris (1) Sikkim (8) snow (1) Yuksom (5) ಅನಿಮೇಟೆಡ್ (1) ಅನುಭವ ಕಥನ (7) ಅಮೂರ್ತ (1) ಆಟೋಟ (2) ಆಫಿಡ್ (1) ಇರುವೆ (6) ಉಡುಪಿ (4) ಉರಗ (3) ಏರಿ (1) ಒಂಟಿ ಚಕ್ರದ ಸೈಕಲ್ (1) ಒಯ್ಯುಗೆ (6) ಕದ (1) ಕಂದು ಏಲಕ್ಕಿ (1) ಕನ್ನಡ (2) ಕಪ್ಪು ಏಲಕ್ಕಿ (1) ಕಪ್ಪು-ಬಿಳುಪು (5) ಕಂಬಳ (1) ಕಂಬಳಿಹುಳು (2) ಕವನ (15) ಕವಿ ಶೈಲ (1) ಕಸರತ್ತು (1) ಕಳಸ (1) ಕಳ್ಳತನ (1) ಕಾವೇರಿ (1) ಕಾಳಾವಾರ ಬೆಟ್ಟ (1) ಕಾಳಿಂಗ ಸರ್ಪ (1) ಕಿಸ್ಕಾರ (1) ಕೀಟ ಪ್ರಪಂಚ (35) ಕುಂದಾಪುರ (1) ಕುವೆಂಪು (1) ಕೃಷಿ (9) ಕೃಷಿ ಮೇಳ (4) ಕೆರೆ (2) ಕೆಲಸ (2) ಕೆಸು (2) ಕೆಳದಿ (1) ಕೊಕ್ಕರೆ ಬೆಳ್ಳೂರು (1) ಕೋಟ (8) ಖಗೋಳ ಗಡಿಯಾರ (1) ಗವಿ (1) ಗುಡಿ ಕೈಗಾರಿಕೆ (1) ಗುಡ್ಡ (2) ಗುಹೆ (1) ಚಾರಣ (3) ಚಿಕ್ಕಮಗಳೂರು (1) ಚಿಟ್ಟಾಣಿ (1) ಚಿಟ್ಟೆಗಳು (3) ಚಿತ್ರ ಪುಟ (101) ಚಿತ್ರದುರ್ಗ (1) ಚಿತ್ರಪುಟ (1) ಚೌಕಾಶಿ (1) ಛಾಯಾಗ್ರಹಣ (24) ಜನ ಜೀವನ (52) ಜನಪದ (2) ಜರ್ಮನಿ (1) ಜಲಪಾತ (1) ಜೆಕ್ ಗಣರಾಜ್ಯ (4) ಜೇಡ (3) ಜೇನು ಸಾಕಣೆ (1) ಜೋಡಿ (1) ತರಕಾರಿ (2) ತುಮಕೂರು (2) ತೆಂಗಿನ ಕಾಯಿ (1) ತೆಂಗಿನ ತೋಟ (1) ದಸರ (4) ದೇವವೃಂದ (1) ದೇವಸ್ಠಾನ (1) ದೊಡ್ಡ ಏಲಕ್ಕಿ (1) ಧಾರವಾಡ (1) ನಂಬಿಕೆ (1) ನಾಟಕ (1) ನೀರ್ಹಕ್ಕಿ (6) ಪತಂಗ (1) ಪತ್ರಿಕೋದ್ಯಮ (1) ಪಶ್ಚಿಮ ಘಟ್ಟ (2) ಪಾಳು (1) ಪುಸ್ತಕ ಬಿಡುಗಡೆ (1) ಪೋರ್ಟ್ರೈಟ್ (8) ಪ್ರಬಂಧ (2) ಪ್ರವಾಸ ಕಥನ (3) ಪ್ರಾಹ (1) ಪ್ಲಾಸ್ಟಿಕ್ (1) ಬಕೇಟ್ (1) ಬಂಡಿ (1) ಬಣ್ಣ (1) ಬನವಾಸಿ (1) ಬಳ್ಳಿ (1) ಬಾಗಿಲು (1) ಬಾರ್ಕೂರು (1) ಬೀಗ (1) ಬೆಂಗಳೂರಿನ ಚಿತ್ರಗಳು (5) ಬೆಂಗಳೂರು (24) ಬೇಸಾಯ (1) ಬ್ರಹ್ಮಾವರ (1) ಭಾರತ ಬಂದ್ (1) ಭಿಕ್ಷುಕರು (1) ಮಕ್ಕಳು (10) ಮಂಜು (2) ಮಮ್ಮಮ್ (3) ಮಲೆನಾಡು (1) ಮಳೆ (1) ಮಳೆಗಾಲ (2) ಮಾರಿಕಣಿವೆ (1) ಮುಸ್ಸಂಜೆ (1) ಮೇಲುಕೋಟೆ (2) ಮೈಸೂರು (7) ಮೋಡ (2) ಮ್ಯಾಕ್ರೋ (12) ಯಕ್ಷಗಾನ (2) ರಸ್ತೆ (5) ರಾತ್ರಿ ನೋಟ (3) ರೈಮ್ (1) ರೈಲು (2) ರೈಲುಹಳಿ (1) ಲಲಿತ ಪ್ರಬಂಧ (6) ಲೇಪಾಕ್ಷಿ (1) ವಂಡಾರ್ (1) ವಾಸ್ತು ಶಿಲ್ಪ (1) ವಾಹನ (2) ವಿವೇಕ (1) ವ್ಯಕ್ತಿ ವಿಷಯ (3) ವ್ಯಾಪಾರ (1) ಶಾಲೆ (1) ಶಿರಸಿ (1) ಶಿರಸಿ. ಸೈಕಲ್ (1) ಶಿಲ್ಪ (1) ಶಿವನಸಮುದ್ರ (1) ಶುಭಾಶಯ (2) ಸಣ್ಣ ಕಥೆ (4) ಸಂತೆ (2) ಸಮುದ್ರ (2) ಸಮುದ್ರ ಜೀವಿ (2) ಸಸ್ಯ ಪ್ರಪಂಚ (12) ಸಾಕು ಪ್ರಾಣಿ (4) ಸಾಸ್ತಾನ (1) ಸಿಕ್ಕಿಂ (3) ಸೈಕಲ್ (5) ಸೈಕಲ್ ಯಾತ್ರೆ (1) ಸ್ಕಂದಗಿರಿ (1) ಸ್ತೂಪ (1) ಸ್ಪರ್ಧೆ (1) ಹಕ್ಕಿಗಳು (21) ಹಳ್ಳಿ (3) ಹಿಮ (1) ಹೂಗಳು (5) ಹೊಸ ವರ್ಷ (1) ಹೋಂ ಸ್ಟೇ (1) ಹೌರಾ (1)